Bonjorn, m’apèli David Revoy e soi un artista francés nascut a Reims en 1981 e vivent a Montalban. Soi autodidacte e passionat d'un fum de causas : lo dessenh, la pintura, los gats, l'informatica, l'open source, Gnu/Linux, Internet, los jòcs videos vièlhs, los mangas vièlhs, l'art, la cultura japonesa e la fantasiá...
Après mai de 10 ans de trabalh coma independent en fasent de comandas per l’edicion, l’ensenhament, los estúdios de jòc-vidèo o de films d'animacion, trobèri mon camin amb un projècte personal que mescla totas mas passions ; e aqueste projècte, s'apèla Pepper&Carrot.
Trabalhi sus aqueste projècte dempuèi lo mes de mai de 2014 e recebèri l'ajuda de fòrça contributors, contributoras e mecènas pendent aquel temps. Trobaretz la lista completa dels crèdits dins l'onglet Licéncia del site.
Mon blòg : www.davidrevoy.com
Mon corric : info@davidrevoy.com
Lo projècte Pepper&Carrot es finançat per sos lectors venguts del monde tot. Cada lector pòt mandar una petita pèça per ajudar la publicacion d'un episòdi novèl. Pareis puèi dins los mercejaments d'aquel episòdi. Mercés a aquel sistèma, Pepper&Carrot demòra independent e protegit del monde editorial, de la publicitat e del marketing agressiu.
Totes los contenguts que crèï a l'entorn e per Pepper&Carrot son sus aqueste site, gratuits e disponibles per totes. Vos respècti totes al meteis nivèl : amb o sens moneda. Totes los bònus que fau pels mecènas son tanben aquí. Pepper&Carrot vos demandarà pas jamai de pagar qué que siá o de vos marcar enlòc per aver accès al contengut.
Vòli donar als autres lo dreit d’utilizar, de cambiar e mai de comercializar lors projèctes qu'utilizan Pepper&Carrot. Totas las paginas, dessenhs e autres contenguts son estats creats amb de logicials liures (Gnu/Linux), e totas las sorsas son sus aqueste site (menut botons « Sorsas e Licéncia » a costat de cada mèdia). L’utilizacion comerciala, las traduccions, los fan-arts, l’impression, los films, los jòcs videos e lo re-partatge sus la tela son encoratjats. Vos demandi pas que de creditar las òbras de lors autors respectius (artistas, correctors, traductors investits dins la creacion de l’òbra), d’integrar un ligam cap a la licéncia e d'indicar se de modificacions son estadas faitas sus l'òbra. Podètz ensenhar aquelas informacions d’un biais rasonable, sens suggerir ça que la que los autors vos sostenon dins la faiçon qu'avètz utilizat lors òbras. Se pòt legir mai d'informacions aquí :
Licéncia : Creative Commons Attribution 4.0 International.
Pepper&Carrot es una comèdia umoristica per totes los publics. I trobaretz pas ni sèxe, ni violéncia. Coma es gratuit, liure e open source, Pepper&Carrot es un polit exemple per mostrar que la cultura liura pòt èstre simpatica. Mos esfòrces an per tòca la creacion d'una BD de qualitat nauta, perque gratuit, liure e open source vòl pas dire amator al rebais. Es plan lo contrari.
Sens intermediaris entre los artistas e l'audiéncia, pagatz mens e ne beneficii mai. Me finançatz d'una faiçon mai dirècta. Cap d'editor, de distributor, d'equipa marketing o d'efièit de mòda me pòdon pas obligar a adaptar Pepper&Carrot a lor vision del « mercat ». Perqué una sola capitada sufiriá pas a far un efièit « pomèl » dins una industria en crisi ? Veirem...
Venir mecèna