Lo projècte Pepper&Carrot es entièrament finançat per la generositat sos lectors venguts del monde tot. En contribuissent financièrament, cada mecènas jòga un ròtle vital en permetent la creacion de contenguts novèls, e en retorn, an la possibilitat de veire lor nom inscrich dins los mercejaments a la fin dels futurs episòdis. Mercés a aquel sistèma, Pepper&Carrot demòra independent e protegit del monde editorial, de la publicitat e del marketing agressiu.
Totes los contenguts que crèï a l'entorn e per Pepper&Carrot son sus aqueste site, gratuits e disponibles per totes. Vos respècti totes al meteis nivèl : amb o sens moneda. Totes los bònus que fau pels mecènas son tanben aquí. Pepper&Carrot vos demandarà pas jamai de pagar qué que siá o de vos marcar enlòc per aver accès al contengut.
Vòli donar als autres lo dreit d’utilizar, de cambiar e mai de comercializar lors projèctes qu'utilizan Pepper&Carrot. Totas las paginas, dessenhs e autres contenguts son estats creats amb de logicials liures (Gnu/Linux), e totas las sorsas son sus aqueste site (menut botons « Sorsas e Licéncia » a costat de cada mèdia). L’utilizacion comerciala, las traduccions, los fan-arts, l’impression, los films, los jòcs videos e lo re-partatge sus la tela son encoratjats. Vos demandi pas que de creditar las òbras de lors autors respectius (artistas, correctors, traductors investits dins la creacion de l’òbra), d’integrar un ligam cap a la licéncia e d'indicar se de modificacions son estadas faitas sus l'òbra. Podètz ensenhar aquelas informacions d’un biais rasonable, sens suggerir ça que la que los autors vos sostenon dins la faiçon qu'avètz utilizat lors òbras. Se pòt legir mai d'informacions aquí :
Licéncia : Creative Commons Attribution 4.0 International.
Pepper&Carrot es una comèdia umoristica per totes los publics. I trobaretz pas ni sèxe, ni violéncia. Coma es gratuit, liure e open source, Pepper&Carrot es un polit exemple per mostrar que la cultura liura pòt èstre simpatica. Mos esfòrces an per tòca la creacion d'una BD de qualitat nauta, perque gratuit, liure e open source vòl pas dire amator al rebais. Es plan lo contrari.
Sens intermediaris entre los artistas e l'audiéncia, pagatz mens e ne beneficii mai. Me finançatz d'una faiçon mai dirècta. Cap d'editor, de distributor, d'equipa marketing o d'efièit de mòda me pòdon pas obligar a adaptar Pepper&Carrot a lor vision del « mercat ». Perqué una sola capitada sufiriá pas a far un efièit « pomèl » dins una industria en crisi ? Veirem…
Mentre tòrni agachar las linhas qu'escriguèri sus la pagina d'acuèlh fa dètz ans – « Una benda dessenhada web liura e de còdi font dobèrt, finançada directament per sos mecènas per cambiar lo mond de l'industria de la benda dessenhada ! » – soi estrambordat de constatar a quin punt l'industria a cambiat. Foguèt Pepper&Carrot un catalisador per qualques unes d'aqueles cambiaments ? Internet èra complètament diferent a l'epòca. Las bendas dessenhadas web se basavan sus un sol modèl economic : vendre de produches derivats e acceptar de dons pontuals sus PayPal. Lo concèpte de mecenat recurrent èra encara fòrça jove.
Soi fièr de dire que Pepper&Carrot foguèt una de las primièras bendas dessenhadas en linha a rejónher l’iniciativa de Patreon, lançada per de Youtubaires qu'an cercat a revolucionar la faiçon dont los artistas èran sostenguts financièrament. Uèi, las platafòrmas de mecenat son vengudas la nòrma, e es rare de trobar un artista que n'utilize pas una.
Pasmens, mas idèas an pas totas portat fruch. Ma decision d'utilizar solament de logicials jos licéncias liuras e de còde font dobèrt, e de crear una benda dessenhada entièra en utilizant aquestes espleches, demòra un apròchi pauc comun. Fòrça artistas an optat per un modèl mai tradicional, ont crèan de ressorsas jos drech d'autor, e se basan sul mecenat per finançar lor trabalh. Encara qu'aqueste modèl fornisca sovent un « accès liure » al contengut, pensi qu'es un sistèma deficient, perque o garantís pas.
Amb mon modèl, los lectors finançan pas solament la creacion de contengut – ne ganhan un accès garantit e irrevocable, amb lo drech de lo tornar utilizar e de lo modificar, quitament comercialament. Aqueste apròchi garantís que lo trabalh demòre liure e dobèrt, puslèu que blocat darrièr de barradisses pagants o de licéncias proprietàrias. En brèu, çò qu'es finançat pel public deu apartenir al public.
Quand agachi l'estat actual de l'industria, soi mai convençut que jamai que mon apròchi es lo bon. Los logicials proprietaris son de mai en mai tocats per de problèmas de confidencialitat, e de foncionalitats (Blockchain/NFT/IA) que degun vòl pas levat los investisseires. Mentretant, los artistas se baton contra de problèmas de drech d'autor, d'apertenéncia a d'editors, a de plataformas, e de restriccions sus ont pòdon publicar lor trabalh.
Es per aquò que ma filosofia demòra incambiada. Cresi totjorn qu'utilizar las licéncias Creative Commons e de logicials liures e de còdi font dobèrt es la clau per una vertadièra libertat de creacion. Mon eslogan – « Un webcomic liure e de còdi font dobèrt finançat dirèctament per sos mecènas per cambiar l'industria de la benda dessenhada ! » – demòra un principi fondamental per ieu, e mai s'es una vision minoritària.
Sabi que soi pas qu'una gota d'aiga dins l'ocean, mas me soi engatjat a contunhar de promòure una industria mai dobèrta, mai liura e mai creativa. Soi fièr de far partida d'un movement que se desvolopa lentament mas segurament, e soi reconeissent envèrs mos mecènas que me sostenon dins aquesta aventura.
− David Revoy