Hola, el mi nome ye David Revoy, y soi un artista francés ñacíu'n 1981. Soi autodidauta y apasionáu pol dibuxu, pintura, gatos, ordenadores, GNU/Linux, Internet, los videoxuegos RPG de la vieya escuela, los vieyos manges y series d'anime, el arte tradicional, la cultura xaponesa, la fantasía…
Depués de más de 10 años siendo autónomu trabayando'n pintura dixital, enseñu, arte conceutual, illustración y direición artística; decidí entamar el mi propiu proyeutu. Finalmente atopé un xeitu d'amestar toles mis pasiones xuntes: el resultáu ye Pepper&Carrot.
Toi trabayando nesti proyeutu dende mayu de 2014 y recibí l'ayuda de munchos collaboradores y siguidores nel camín. La llista completa colos créditos alcúentrase nel menú Llicencia.
El mi blog: www.davidrevoy.com
El mi corréu electrónicu: info@davidrevoy.com
El proyeutu Pepper&Carrot ye financiáu por patrocinadores de tol mundu. Cada patrocinador paga una pequena cantidá de dineru por cada nuevu episodiu que ye publicáu, con estu ye incluyíu nos créditos a la fin del nuevu episodiu. Gracies a esti sistema, Pepper&Carrot pue manténese independiente y nun necesita recurrir a la publicidá nin a nenguna contaminación de marketing.
Tol conteníu que produzo sobro Pepper&Carrot alcúentrase nesti sitiu web o nel mi blog, disponible pa toos. Respeto a toos vós por igual: con o ensín dineru. Tol conteníu estra que faigo pa los mis patrocinadores ye tamién equí espublicáu. Pepper&Carrot enxamás te va pidir que pagues o te suscribas p'algamar accesu a conteníu nuevu.
Quiero da-y a la xente'l drechu a compartir, utilizar, desenvolver ya inclusive ganar dineru col trabayu que creé. Toles páxines, illustraciones y conteníu fixéronse con Software Llibre de códigu abiertu en GNU/Linux, y toles fontes tán nesti sitiu web (botones de Fonte y Llicencia). Animáse'l usu comercial, traducciones, fan-arts, impresiones, películes, videoxuegos, distribuciones y re-publicaciones. Namás tienes d'atribuyir la obra a los autores (artistas, correutores, traductores o cualesquier persona arreyada na obra que quieras utilizar), apurrir un enllaz a la llicencia ya indicar si se realizaron cambeos na obra. Pues facer esto de cualesquier xeitu razonable, pero nun de forma que suxura que los autores dante el so respaldu. Pues consultar más información sobro esti tema equí:
Llicencia Creative Commons Atribución 4.0 Internacional.
Peper&Carrot ye un cómic web de comedia/humor fayadizu pa tol mundu, tolos tiempos. Nun tien conteníu adultu nin violvencia, ye de cultura llibre y de códigu abiertu. Peper&Carrot ye un arguyosu exemplu de comu la cultura llibre pue ser. Centróme muncho na calidá, porque que un proyeutu sía de cultura llibre y códigu abiertu nun significa que sía malu o amateur. Tolo contrariu.
Ensín intermediariu ente'l artista y l'audencia tu pagues menos y yo llogro más ganancies. Tu sofítesme direutamente. Ensín editorial, distribuidora, equipu de marteking o policía de la moda que me fuercie a camudar Pepper&Carrot pa qu'encaxe na so visión del "mercáu". ¿Podría un solu ésitu crear un efeutu "bola de ñeve" que ponga'n crisis toa una industria? Yá veremos…
Conviértete'n patrocinador