Adishatz, que m’apèri David Revoy e que soi un artista francés vadut a Reims en 1981 e qui viu a Montalban. Que soi autodidacte e passionat de hèra de causas : lo dessenh, la pintura, los gats, l'informatica, l'open source, Gnu/Linux, Internet, los jòcs videos vielhs, los mangas vielhs, l'art, la cultura japonesa e la fantasia...
Après mei de 10 ans de tribalh com independent en har comandas entà l’edicion, l’ensenhament, los estúdios de jòc-vidèo o de films d'animacion, que trobèi lo men camin dab un projècte personau qui mescla totas las meas passions ; e aqueste projècte, que s'apèra Pepper&Carrot.
Que tribalhi sus aqueste projècte despuish lo mes de mai de 2014 e que recebèi l'ajuda de hèra de contributors, contributoras e mecènas pendent aqueth temps. Que trobaratz la lista completa deus crèdits dens l'onglet Licéncia deu site.
Lo men blòg : www.davidrevoy.com
Lo men corric : info@davidrevoy.com
Lo projècte Pepper&Carrot qu'ei finançat peus sons lectors vienuts deu monde sancèr. Cada lector que pòt enviar ua petita pèça entà ajudar la publicacion d'un episòdi navèth. Que pareish après dens los mercejaments d'aqueth episòdi. Mercés a aqueth sistèma, Pepper&Carrot que demora independent e protegit deu monde editoriau, de la publicitat e deu marketing agressiu.
Tots los contienguts que crèï au torn e entà Pepper&Carrot que son sus aqueste site, gratuits e disponibles entà tots. Que'vs respècti tots au medish nivèu : dab o shens moneda. Tots los bònus qui hèi entaus mecènas que son tanben ací. Pepper&Carrot ne'vs demandarà pas jamei de pagar qué que sia o de vs'inscríver on que sia entà aver accès au contiengut.
Que vòli balhar aus autes lo dret d’utilizar, de cambiar e de comercializar los lors projèctes qui utilizan Pepper&Carrot. Totas las paginas, dessenhs e autes contienguts que son estats creats dab logiciaus liures (Gnu/Linux), e totas las sorsas que son sus aqueste site (menut botons « Sorsas e Licéncia » au ras de cada mèdia). L’utilizacion comerciala, las traduccions, los fan-arts, l’impression, los films, los jòcs videos e lo re-partatge sus la tela que son encoratjats. Que'vs demandi sonque de creditar las òbras deus lors autors respectius (artistas, correctors, traductors investits dens la creacion de l’òbra), d’integrar un ligam de cap tà la licéncia e d'indicar si modificacions e son estadas hèitas sus l'òbra. Que podetz ensenhar aqueras informacions d’ua faiçon rasonabla, shens suggerir totun que los autors e'vs sostienen dens la faiçon dab la quau avetz utilizat las lors òbras. Que podetz léger mei d'informacions ací :
Licéncia : Creative Commons Attribution 4.0 International.
Pepper&Carrot quei ua comedia umoristica entà tots los publics. N'i trobaratz pas nat sèxe, nada violéncia. Com ei gratuit, liure e open source, Pepper&Carrot qu'ei un beròi exemple entà amuishar que la cultura liura e pòt estar simpatica. Los mens esfòrç qu'an per objectiu la creacion d'ua BD de qualitat hauta, per'mor gratuit, liure e open source ne vòu pas díser amator a carn de can. Qu'ei plan lo contrari.
Shens nat intermediaris enter los artistas e l'audiéncia, que pagatz mensh e que'n beneficii mei. Que'm finançatz d'ua faiçon mei dirècta. Nat editor, nat distributor, nada equipa marketing o nat efièit de mòda ne'm pòden pas obligar a adaptar Pepper&Carrot a la lor vision deu « mercat ». Perqué ua sola escaduda ne seré pas pro entà har un efèit « tanòsca » dens ua industria en crisi ? Que vederam...
Vàder mecèna