Hei, eg er David Revoy, ein fransk kunstnar fødd i 1981. Eg er sjølvlært, med lidenskap for teikning, måling, kattar, datamaskiner, GNU/Linux, fri programvare, fri kultur, Internett, tradisjonelle RPG-dataspel, gammal manga og anime, tradisjonell kunst, japansk kultur, fantasy, …
Etter meir enn ti år som frilansar innanfor digital teikning, undervising og som illustratør for dataspel og animasjonsfilmar valde eg å starta mitt eige prosjekt. Endeleg fann eg ein måte å kombinera alle lidenskapane mine – og resultatet er Pepar & Gulrot.
Eg har arbeidd med dette prosjektet sidan mai 2014, med god hjelp frå mange bidragsytarar og støttespelarar. Du finn ei fullstendig oversikt over bidragsytarane under lisensmenyen.
Bloggen min: www.davidrevoy.com
E-postadressa mi: info@davidrevoy.com
Pepar & Gulrot er utelukkande finansiert av lesarane, som kjem frå heile verda. Ein lesar som vel å sponsa teikneserien, betalar litt for kvar nye episode og vert takka i teksten på slutten av episoden. Denne ordninga gjer at Pepar & Gulrot held fram med å vera uavhengig, og nettstaden treng aldri ha reklame eller andre forstyrrande element.
Alt innhaldet eg lagar om Pepar & Gulrot på denne nettstaden og på bloggen min, er fritt tilgjengeleg for alle. Eg respekterer dykk alle like mykje, anten de har pengar eller ikkje. Alle bonusane eg lagar for sponsorane, vert òg lagde ut her. Pepar & Gulrot vil aldri forlanga betaling eller abonnement for tilgang til nytt innhald.
Eg ynskjer å gje alle retten til å dela, bruka, byggja og til og med tena pengar på det eg har laga. Alle sidene, teikningane og innhaldet er laga med fri programvare på GNU/Linux, og alle tilhøyrande kjeldefiler er tilgjengelege her på nettstaden (sjå «Kjeldefiler» og «Lisens»-knappane). Eg oppfordrar til kommersiell bruk, omsetjing, teikningar av figurane, trykte bøker, filmar, dataspel og anna vidareformidling. Berre hugs å kreditera opphavspersonane (teiknarar, korrekturlesarar og omsetjarar som har vore med på å laga materialet du ynskjer å bruka), oppgje lenkje/adresse til lisensen og opplys om du sjølv har gjort endringar. Alle rimelege måtar å gjera dette på er greitt, men du kan ikkje gjera det på ein måte som gjer at det verkar som at opphavspersonane støttar deg eller måten du har brukt materialet på. Du finn meir informasjon her:
Creative Commons Attribution 4.0 International-lisensen.
Pepar & Gulrot er ein humoristisk teikneserie for alle, uansett alder. Teikneserien inneheld aldri vakseninnhald eller vald. Som ein fri teikneserie med opne kjelder er Pepar & Gulrot eit flott eksempel på kor kul fri kultur kan vera. Eg legg mykje vekt på kvalitet, etikk og profesjonalitet, sidan fri bruk og opne kjelder ikkje tyder sekunda vare – tvert imot!
Utan nokon mellommann mellom serieskaparen og publikum betalar du mindre og eg får meir. Du støttar meg direkte. Ingen forlag, distributørar, PR-team eller noko motepoliti kan tvinga meg til å endra Pepar & Gulrot til å passa deira syn på «marknaden». Kan ikkje ein einskild suksess forandra ein heil bransje i krise? Me får sjå …
Vert fast sponsor