Demat, David Revoy eo va anv. Un arzour gall ganet e 1981 on me. Desket em eus va-unan ha sot on gant an tresañ, al livouriezh, ar c'hizhier, an urzhiataerioù, ar sevenadur mammenn digor GNU/Linux, ar genrouedad, ar c'hoarioù-video RPG mod kozh, ar manga hag anime kozh, an arz hengounel, ar sevenadur japanat, ar moliac'h…
Goude bezañ bet 10 vloaz o labourat ma-unan el livouriezh niverel, en deskadurezh, en arz-meizad, er skeudenniñ, er renerezh-arzel, em eus divizet kregiñ gant va raktres din-me. Kavet em eus un doare da veskañ kement a laka birvilh ennon asambles ; hag an disoc'h a zo Pepper&Carrot.
Labourat a ran war ar raktres-mañ abaoe miz Mae 2014 ha sikouret on bet gant kalz a dud ha kalz a baeronien a-hed an amzer. Kavout a rit roll klok ar c'hreditoù war ar bajenn Lañvaz al lec'hienn.
My blog: www.davidrevoy.com
Ma fostel : info@davidrevoy.com
Pepper&Carrot a zo ur raktres arc'hantet gant e baeroned nemetken, gant tud o tont eus pep lec'h er bed. Ur sammadig arc'hant a vez roet gant pep paeron evit kement rann nevez embannet, ha lakaet e vez o anv e dibenn ar rann nevez. A-drugarez d'an aozadur-mañ ez eo dizalc'h Pepper&Carrot ha ne vez morse saotret gant bruderezh.
Kement endalc'had krouet ganin diwar-benn Pepper&Carrot a zo war al lec'hienn-mañ, digoust ha hegerz d'an holl. Doujañ a ran d'an holl : paour pe pinvidik. An holl endalc'hadoù ouzhpenn a ran evit va faeroned a vez embannet amañ ivez. Ne vo morse goulennet paeañ evit koumanantiñ da Pepper&Carrot pe evit kaout traoù nevez.
Fellout a ra din reiñ ar gwir d'an dud rannañ, implij, sevel ha zoken gounid arc'hant gant al labour a grouan. An holl bajennoù, brastresoù hag endalc'had a zo savet a-drugarez da veziantoù frank war GNU/Linux, hag an holl vammennoù a zo war al lec'hienn-mañ (boutonoù « Mammennoù ha Lañvaz » e-kichen pep media. Gallout a rit hardizh ober un implij kenwerzhel, treiñ, sevel fan-art, moullañ, sevel filmoù, c'hoarioù video ha rannañ kement ha ma fell deoc'h. Goulenn a ran diganeoc'h menegiñ anv an oberourien (arzourien, difazierien, troerien hag a labour evit ar yezh a fell deoc'h implijout), hag ivez lakaat ul liamm war-zu al lañvaz ha merkañ hag-eñ ez eus bet degaset kemmoù en oberenn. Ret eo deoc'h menegiñ an titouroù-se d'un doare poellek, hep lakaat da soñjal e vezit sikouret pe harpet gant an aozerien en doare hoc'h eus implijet o oberennoù. Evit muioc'h a ditouroù, lennit :
Creative Commons Attribution 4.0 International license.
Ur webcomic fentus graet evit an holl, a bep oad eo Pepper&Carrot. Ne vez kavet nep danvez revel na tamm feulster ebet. Digoust ha frank, ur skouer eo Pepper&Carrot eus pegen dreist ha dudius e c'hall ar sevenadur frank bezañ. Tremen a ran kalz amzer d'ober pep tra ervat, rak ne dalvez ket mammenn digor kement ha fall pe amatour dre ret. Er c'hontrol.
Ma vez nebeutoc'h a hanterourien etre an arzour hag al lennerien e paeit nebeutoc'h hag e c'hounezan muioc'h. Harpañ a rit ac'hanon war-eeun. Embanner/dasparzher/bruder ebet n'hall lakaat ac'hanon da cheñch Pepper&Carrot evit ma klotfe muioc'h gant o doare da sellet ar 'marc'had'. Ha ma c'hallfe un taol berzh e-unan kemmañ ur greanterezh en he fezh ? Klaskomp 'ta !
Dont da vezañ paeron